صمت القصور :الامين لطرش من اختيار عبد الله بن يونس

عبد الله بن يونس : يعود الى الابداع ويكمل ملحمته " نجمة سما " بعد12 سنة

نِجْمِة ْ سْمَا (2)
بقلم عبدالله بنيونس
( ملاحظة: عدت بعد 12 سنة إلى إكمال الملحمة، بعد التشجيع الذي لقيته من الأصدقاء. و أظنها ستكون ملحمة طويلة لأنني سأحكي فيها ملحمتي كإنسان يخوض صراع الحياة، و إذا كانت الملحمة تسرد الأعمال البطولية الخارقة التي يخوضها بطل خارق، فإن ذلك البطل ما هو إلا الإنسان في صراعه، و في بحثه الدائم عن قيم تجعل حياته أجمل. حتى إذا كان ذلك في مستوى الخيال و الحلم. )
بَعْدْ السْنينْ تـْعَدّْتْ
و المَلـْحْمَه من وَقـْتـْها ما تـَمِّتْ
زَعْمَه اللـِّي مْشْتْ وْ وَلـِّتْ
خَلـِّتْ وْراها الهَمْ و الأحْزانْ؟
هَزِّتْ مْعاها الرُّوحْ وَلاَّ خَلـِّتْ؟
ولاَّ الشّعْرْ بَعْدْها ما كانْ؟

لامُوا عْلـَيَّ صْحابـِي
قالـُوا عْلاشْ الشّعرْ عَنْدِكْ خابـِي؟
غـِيرْ قـُولْ يا قـَوَّالْ ولاَّ صابـِي؟
تِعْبـِدْ النـِّجْمَه في السْما سَهْرانْ؟
وْ كي تـْفارْقِكْ تـُقـْعِدْ مْرِيضْ وْ هابـِي
و الشّعرْ نارُو مْدَخـْنَه دُخـَّانْ؟

وَلاَّ القـَرِيحَه ماتِتْ؟
و الشّعْرْ في قـَلـْبِكْ أيَّامُو فاتِتْ؟
ولاَّ قـْلِيبـِكْ ماتْ ولاَّ سابـِتْ؟
ولاَّ الكْلامْ ما عادْ فيهْ أوْزانْ؟
ولاَّ الزْمانْ الكَلـْبْ فيهْ نـْوابـِتْ
تـُقـْتِلْ القـَمْحْ وْ تـُزْرُعْ الزِّيوانْ؟

وَاشْ بـِيهْ بـِيرِكْ شايِحْ؟
و الما مْتاعِكْ وِينْ رِيتـُو سايـِحْ؟
ولاّ الرُّوحْ ما عادْ فيها قـْرايـِحْ
تـْفـَجِّرْ الشّعرْ يْهَرْهِرْ الوِدْيانْ؟
ولاّ العُودْ كْبِرْ فيهْ سْوايـِحْ
نـْخـَرْها العْمُرْ وْ دَبْ بـِالبـِهْتانْ؟

ولاَّ النـْسا ما عادْ فـِيهِمْ مُهْرَهْ؟
تـَامِّة ْ الزِّينْ وْ راشـْدَه بالوَهْرَه؟
تـْجِيبْ الدْوا للرُّوحْ كيفْ الزَّهْرَه
تـْرَجِّعْ القـَلـْبْ صْغِيرْ فيهْ أمْحانْ؟
كي تـْدُورْ بيهْ تـْشـَعْلـُو كِالجَّمْرَهْ
وَ تـْزِيدْ تـَحْرِقْ فيهْ بـِالكَيَّانْ؟

تـَحْفِرْ البـِيرْ غـْرِيقـُو
تـْغـَرِّقْ عْلِيهْ حَتـَّاشْ تِلـْقـَى زِيقـُو
تـْرَجِّعْ الما لِطْرِيقـُو
يَنـْهِرْ يْفِيضْ يْهِيلْ كِالطُّوفانْ؟
وْ يَرْجِعْ الشِّعْرْ يْبانْ ليهْ بْرِيقـُو
يْثـُورْ الصْبَيْ الـْوَسْمْتـُو يَقـْظانْ؟

هاذَاكْ قـُولْ صْحابي
سُؤالْ في سؤالْ غِيرْ جْوابي
قـَالـُوهْ دِيمَه دْخـَلْ بـِينْ جْنابي
هَدْ السْجونْ وْ هَدْها هَدَّانْ
حْرَقْ الكْبـِيدَه رَدْنِي لِشْبابي
سْجونْ القـَرِيحَه فـْلِقـْتـْها فـَلـْقانْ


نجيبْ يا بَرْقاوي
يا صِيدْ دامي زْهيرْ ديمَه داوِي
راجِلْ عْليكْ كـْلامْ ديمَه قـَاوي
يْخافـُوهْ طرْحَه يِهْمْزُوا هَمْزانْ
يِتـْمَسْكْنـُوا يـِتـْمَعْشُوا بـِِرْشاوي
يْذِلـُّوا الشْعُوبْ وْ يَقـْبْضوا لـَثـْمانْ

وْ سامي كـْبـِيرْ وْ شامِخْ
في مَوْقـْفـُو دِيمَه صْحِيحْ وْ راسِخْ
سَمَّاعْ شِعْرْ عْلِيهْ دِيمَه شَايـِخْ
فـَهَّامْ يـِفـْهِمْ يُوزْنـُو وَزْنانْ
نـَبِّهْتْ فِيَّ غـُولْ رِيتـُو دايـِخْ
رَدِّيتـْني لِقـْرِيحْتي رَدَّانْ

و عْلِي وْلِيدْ الصَّحْرا
راجِلْ عَقـَلْ وْ عِلـْمْ عَنـْدُو وَهْرَه
وْ سَفـْرَه وْ سَفـْرَه وْ جَوْلـْتِينْ وْ سَهْرَه
وْ من ثـَمْ خـُضـْنا في الحْدِيثْ ألـْوانْ
الحُرِّيَّه و التـَّنـْوِيرْ عَنـْدُو فِكـْرَه
فيها الدْوا لِعْلاجْ ها الأوْطانْ

يا عْلِي نـْسِيبـِي الغالِي
و اللهْ يـِشْهِدْ وَحْشـْتِي و احْوالي
مِسْتاحْشُو مِسْتاحْشُو في بالي
وْ هاذَاكْ خـُويا بْعِيدْ في عُمانْ
نِتـْفـَكـْرُو وْ نِتـْصَوْرُو في خـْيالي
وَ غـْرِسْتـْلو بينْ الظْلـُوعْ جْنانْ

وَصْلاحْ بن عيّادْ عِشْرَه طْويلـَه
وْ تـَعْرِفْ لـْيالِي الشّعرْ و التِّهْويلـَه
وْ تعْرِفْ لـْيالي الحُبْ لِيلـَه بْلِيلـَه
وْ تـَعْرِفْ معاها الخوخْ و الرُّمّانْ
وْ تـَعْرْفْ الطُّفـْلـَه الثـَايْرَهْ و جْمِيلـَه
وْ تـَعْرِفْ جْنـُونُو وْ هَبْلـْتـُو يَقـْظانْ


وْ تـَعْرِفْ الدُّهْنْ وْ خِدْمْتـُو المِقـْدِيَّه
وْ تـَعْرِفْ النـِّجْمَه العاشْقـَهْ المِضـْوِيَّه
وْ تـَعْرِفْ مْعاها ثـْنِينْ فـَرْدْ ثـْنِيَّه
نـَوْيَاكْ خِيوَه شَقـْنا شِيطانْ
قـْتِلـْناهْ و رْمِيناهْ في مُخـْلِيَّه
مْشِينا الطْرِيقْ رْفاقْ في لـَزْمانْ

وْ تـَعْرِفْ اخـَّيِّكْ مَرْضـْتـُو مِقـْضِيَّهْ
و ايَّامْ سُودَه عادِيَه مِعْدِيَّه
وْ قِدَّاشْ ما مَدِّيتْ لِيكْ يْدَيَّ
وْ ما تـْرَكـْتـْنِيشْ نـْطِيحْ في النـِّسْيانْ
رَمِّمْتْ رُوحي حْمِيتْ منْها شْوَيَّه
وْ حَجْرَه حَجْرَه بْنِيتـْني بَنـْيانْ

وْ عادِلْ نـْظِيفْ وْ دَمْعَهْ
نـْهارِينْ كانِتْ رْواحْنا مِجْتـَمْعَه
عَدِّيتْ نـَوْياكْ خـْمِيسْ وْ جِمْعَه
وْ حاوِرْتـْني في هْمومْ ها الإنسانْ
وَ ضـْوِيتْ في لـَيَّامْ كِيفْ الشـَمْعَه
نـَحِّيتْ عَالمَكـْنـُونْ كـُلْ ادْرَانْ

وْ مُحمّدْ العيّادي
يا وِلـْدْ وَطْني وْ تـُرْبْتي و اجْدادي
و ابْطالْ في التـَّاريخْ ديمَه تـْنادي
يا وْلادْ تـُونسْ آهْ يا شـُجْعانْ
وْ كانْ النـِّضالْ قـْديمْ فـِكـُمْ بادي
وْ حشّادْ يـِبْقى حُرْ كـُلْ زْمانْ

كيفْ جـِيتـْنا بالمَرْصِدْ
رَدْ الحْيا في ارْواحْ قـُرْبـِتْ تـِخـْمِدْ
خـَلـَّى النـّاسْ تـِكـْتِبْ وْ تـَقـْرا وْ تـِشـْهِدْ
وْ تـَحْكي عْلى اللـِّي يْصِيرْ في لـَوْطانْ
رَدِّيتْ لـَيَّ الشِّعْرْ يا مُحمِّدْ
و سْقـِيتْ رُوحي بْحُلـْمِكْ المِزْيانْ


ما نِيشْ فِيكـُمْ نِشـْعِرْ
وْ مانِيشْ ناوِي بْحُبْكِمْ نِشَّهْدِرْ
لكنْ شْهادِةْ حَقْ فيها نْعَبِّرْ
عْلى اللِّي حْيـِيتُوا بـِيهْ ها الإنـْسانْ
و زْرَعْتـُوا في الرُّوحْ زَرْعْ مْجَدِّرْ
وْ هذا نـَوّارُو و الثـْمَرْ يْبانْ

هَاذي تـَحِية ْ صْحابي
كِي نـَحْتـَفِلْ بْعَوْدْتِي لِصْوابِي
و نـْقـُولـْهُمْ يا باقـْيـينْ حْبابي
بَعْدْ اللـِّي راحُوا وْ ذِكـْرْهِمْ ما بانْ
مزَّالْ مِنـُّو في القـْلـُوبْ خـْوابي
مِكـْمِي مْخـَبِّي بْعِيدْ عَالنـِّسْيانْ

وْ من ثـَمْ قـُلـْتْ نـَرْجِعْ
للشـِّعرْ أرضي نـَحْرِثْ نـْخـُطْ وْ نـُزْرُعْ
نـُزْرُعْ الوَرْدْ يـِكـْبـِرْ يْهِيجْ وْ يـِفـْزِعْ
نِسْقِي الأمَلْ يْمِدْ لِيهْ اغـْصانْ
نـْقـُولْ القـْصايِدْ حامْيَه و تـْصَدِّعْ
بَنـْيْ الظْلامْ تـْهِدْ ليهْ اركانْ

ها المَلـْحْمَه نـْكـَمِّلـْها
نـْسَطِّرْ سْطَرْها وْ نـُنـْقـُشْ مْفاصْلـْها
وْ نـَحْكِي عْلى بْلادِي مْشِتْ بْهَلـْها
تونسْ بْلادِي زِينِة ْ البـِلـْدانْ
و نـْقـُولْ للتـَّارِيخْ هايْ عْلِلـْها
نِخـْدِمْ بْلادِي خِدْمِة ْ الفـَنـَّانْ

مَزّالْ شِعْرْ يـِبْهِجْ
وْ مَزَّالْ بَرْشَه في الجْواجِي يـِسْرِجْ
وْ مَزَّالْ بَرْشَه ابْياتْ صُبْحْ مْبَلـِّجْ
وْ مَزَّالْ فِيَّ جْنـُونْ وْ عُنـْفـُوانْ
وْ مَزِّلـْتْ نـَعْزِمْ نـْقـُولْ شِعْرْ يْهَيِّجْ
عِرْقْ الحْيا في قـَلـْبْ كـُلْ انْسانْ


مَزَّالْ ثـَمَّه زْغـَابـِي
حْرُوباتْ و صْراعاتْ فيها جْوابـِي
نـُنـْظُمْ عْلِيها نـْحِلْ بـِيها ابْوابـِي
نـُنـْشُرْ افـْكاري تـْرِنْ في لـَوْذانْ
تـُوصِلْ ارْواحْ الطَّايْحَه في زْوابـِي
تـْهِزْ العْقـُولْ لـْيـِفـْهْمُوا فـَهْمانْ

مَزَّالْ ثـَمَّه عَرْكـَه
مْشـُومَه وْ مُرَّه مْخـَلـْطَه مِشـْتـَرْكـَه
فيها الفـْنـَا و المُوتْ عَمْلـُوا شـَرْكـَه
ضِدْ الحْيا المَزْرُوعَه في لـَبْدانْ
ضِدْ العْقـَلْ ضِدْ العْمَلْ و الحَرْكـَه
ضِدْ الأمَلْ و الحُلـْمْ في الأكـْنانْ

ضِدْ الشـّبابْ الـْيـِكـْبـِرْ
يـِلـْقـَى في وِجـْهو كـُلْ بابْ مْسَكـِّرْ
بْطالـَه وْ عَطالـَهْ وْ طُغـْيانْ وْ تـَجَبُّرْ
جَهْلْ وْ تـَخـَلـُّفْ سْكِنْ كـُلْ مْكانْ
قـْوادَهْ وْ تـَسَلـُّقْ كـُلْ عْزِيمَه تـَقـْهِرْ
فـْسادْ وْ رَشـَاوِي مْعَشـِّشْ وْ مِطْمانْ

مَزَّالْ عُودِي اخـْضِرْ
وْمَزَّالْ بَدْنِي حَيْ يْحِسْ وْ يُشْعُرْ
وْ مَزَّالْ دَمِّي في العْرُوقْ يْهَرْهِرْ
وْ مَزَّالْ قـَلـْبـِي ساكـْنـُو شِيطانْ
وْ مَزَّالْ عَقـْلِي حُرْ مُوشْ مْحَجِّرْ
وْ مَزَّالْ عَنـْدِي قـُولْ فِيهْ افـْنانْ

وْمَزَّالْ عَظْمي مْعَمِّرْ
وْ مَزَّالْ لـَحْمِي طْرِي مُوشْ مْقـَبِّرْ
وْ مَزَّالْ عَنـْدِي عِينْ بـِيها نـُخـْزُرْ
وْ مَزَّالْ عَنـْدِي فـُمْ فِيهْ لـْسانْ
يَنـْطِقْ يْقـُولْ يْصِيحْ دِيمَهْ يَهْدِرْ
يَصْدِحْ يْصِيحْ يْقـُولْ انا إنـْسانْ


عَنـْدِي حْقـُوقْ نـْعَبِّرْ
وْ عَنْدِي حْقـُوقْ نـْعِيشْ كي نِتـْحَرِّرْ
حَقـِّي أمَلْ حقـّي عْقـَلْ يْفـَكـِّرْ
حقـّي عَمَلْ كـْرِيمْ لِيهْ اثـْمانْ
حَقِّي آرائي حُرْ كيفْ نـْعَبّـِرْ
وْ حقـِّي وطنْ نـْعيشْ فيه انسانْ

حقِّي حْكـُومَه تـِخْدِمْ
تـِحْمي القانـُونْ تـْخـَلـِّيهْ يَعْلى وْ يُحْكـُمْ
وْ حَقـِّي النـّاسْ الكـُلْ لِيهْ تـْسَلـِّمْ
لا عادْ حتَّى حَدْ عْظِيمْ الشـَّانْ
وْ لا عادْ يَعْفِسْ عَالـْقانونْ وْ يـِسْلِمْ
لا وْزِيرْ لا مُدِيرْ في الدِّيوانْ

حَقـِّي قـَضاء مِتـْهَمِّمْ
نـْظْيفْ وْ نـَزِيهْ بْعِيدْ عَاللـِّي يُحْكـُمْ
يْقاضِي السّارِقْ و المُرْتـَشِي و المُجِرِمْ
حتى وَ لـَوْ يْكونْ مِالأعْيانْ
خـَلـِّي المُواطِنْ يْذ ُوقْ العَدالـَهْ وْ يـِنْعِمْ
يـِزِّيهْ راهُو تـْعِبْ مِالأَمْحانْ

حَقـِّي مَجالِسْ لـَيَّ
تـْمـَثـِّلـْنِي بـِالحَقْ مُوشْ مْزِيَّه
مَجْلِسْ إدارَه وْ مَجْلِسْ بَلـَدِيَّه
وْ مُسْتـَشارِينْ وْ مَجْلِسْ بَرْلـَمانْ
وْ مَجْلِسْ وِلاَيَهْ وْ لـَجْنـَه ثـَقـَافِيَّه
وْ مَجْلِسْ القـَرْيَه وْ هَيْئِة ْ المَهْرَجانْ

حَقـِّي تـَعْلِيمْ يْعَلـِّمْ
وْ حَقـِّي وْزارَه تـْقِدْ التـَّعْلِيمْ وْ تِفـْهِمْ
وْ حقـِّي برامِجْ باهْيَه و تـْفـَهِّمْ
تـْنـَحِّي الظْلامْ و الجَهْلْ مِالأذ ْهانْ
وْ حَقـِّي وْلِيدِي يـِكـْبـِرْ يْزِيدْ وْ يـِفـْهِمْ
يْفـَكـِّرْ بْعَقـْلـُو يْشـُوفْ فيهْ عْيانْ


حَقـِّي صَحافـَه شْرِيفـَه
وْ حَقـِّي جَرَايِدْ واعْيَه و نـْظِيفـَه
وْ حَقـِّي إذاعَه تـْبَطِّلْ التـَّخـْرِيفـَه
وْ حَقـِّي تـْلافـِزْ تـْقـُولْ عَلـِّي كانْ
يْهِزُّوا الرِّسالـَه وْ يـِخـْدْمُو الوَظِيفـَه
يْقـُولـُوا الحَقـَايـْقْ لا كِذ ْبْ لا بُهْتانْ

حَقِّي نَقـْلْ مِطَّوِّرْ
وْ حَقـِّي الكارْ الصَّفـْرَا تِتـْغـَيـِّرْ
وْ حَقـِّي الفـْلـُوسْ ما تِتـْسْرِقـْشْ وْ تـُثـْمُرْ
تِشـْرِي كِيرانْ جْدِدْ بَرْشـَه مْتانْ
عْلاشْ العْبادْ مْكـَدْسَه في مَحْجِرْ
يا خي المُواطِنْ حْجَرْ ولاّ انـْسانْ؟

حَقـِّي الطْبـِيبْ النـَّافِعْ
وْ حَقـِّي السْبـِيتارْ مْرَتـِّبْ نـْظِيفْ وْ ناصِعْ
وْ حَقـِّي اقـْسامْ مْرَتـْبَه وَ تْتـَابـِعْ
وْ بَرْشَه طُبَّه مْوَزْعِينْ حْنانْ
وْ حَقـِّي مِلـَفْ مَحْفـُوظْ مِشـُّو ضايـِعْ
وْ حَقـِّي مَوْعِدْ قـْرِيبْ في الزَّمانْ

عْلاشْ العْمُرْ يْضِيعْ مِنِّي سْوايِعْ؟
المَوْعِدْ بْعِيدْ وْ في البْدَنْ وْجايـِعْ
وَ نْهارْ اللـِّي نِمْشِي نِلـْقـَى العْبادْ صْرَايـِعْ
شِبَّاكْ واحِدْ و الصَّفْ بـِالدَّزَّانْ
وْ هذا صْغِيرْ يِرْغِي مْرِيضْ وْ جايِعْ
وْ هَاذِي عْبادْ مْلـَوْحَه مِيسَانْ؟

08 - 09 / 12 / 2009
( و البقية تأتي.. )

البشير عبد العظيم-روح رحل حبيبي

بشير عبد العظيم :الرحلة الرابعة - شكيت البحر

الصحبي شعير وبشير عبد العظيم : حبيب زرعلي - معارضة البرغوثي

بشير عبد العظيم : يحن الطير

حوار شعري بين الشاعرة والفنانة جميلة ينعيسى والشاعر البشير عبد العظيم