نجْمِة ْ سْما بقلم: عبدالله بنيونس

نجْمِة ْ سْما

بقلم: عبدالله بنيونس

( تعليق: هذه القصيدة كتبتها عام 97 عندما كنت أعيش مغامرة عاطفية رهيبة، وأسميها مغامرة رهيبة لأنني سافرت فيها بعيدا إلى أعماق إنسانيتي و إنسانية حبيبتي سفرا يشبه ذلك الذي قال عنه نزار قباني:

الحبّ ليس رواية شرقيـة يتزوّج في ختامها الأبطالُ

و لكنّه الإبحارُ دون سفينة و يقينك أنّ الرّجوع محالُ

و قد أردتها ملحمة شعرية أصوّر فيها تفاصيل تلك المغامرة. لكنني لم أتمكن من إكمالها بسبب موجة من المشاكل حلّت علينا و استمرّت لثلاث سنوات مؤلمة انتهت بنا إلى الفراق. و هذا الجزء الذي كتبت هو مقدمة تلك الملحمة.)
*****

نِجْمِةْ سْمايا بايْتَه بحْذايــا تِلمعْ وْ تضْوي و نورْها ذَبلانْ

تسْمعْ حْديثي تْهِزْ معايا دايا تُصبرْ عْلَيَّ تْوَنّسْ الوحْــدانْ

*****

ها اللِّيلْ لينا صايِرْ

ظلامَهْ وْ صمتهْ عاملينْ سْتايِرْ

زيتونْ بينا دايِرْ

حاملْ ثْمارَهْ زيتْها مَلْيانْ

يشْهِدْ كلامي يْسَطْرَهْ بسْطايِرْ

يحكي عْليهْ يْقولْ عَالوَلْهانْ

*****

ها الليلْ لازِمْ صَمْتَهْ

بَدْرِهْ كاملْ دايْرِهْ عاصِمْتهْ

سُلطانْ في مَحْكِمتِهْ

مْوَشِّحْ مْتَوِّجْ وْ هالتَهْ تَزْيانْ

نْجومْ السْما ناشِرْ عْليها سُلطَه

تُخْزُرْ قْداهْ تْقَدِّسْ السُّلطانْ

*****

و نْجيمْتي مَخفِيَّه

بْعيدَه و في طَرْفْ السْما مِنْسِيَّه

حتّى القْمَرْ حاجِبْ عْليها ضَيَّه

مْكَلِّفْ جْنودَه عاملَه تُرْسانْ

غِيماتْ سُودْ دايْرينْ ثْنِيَّه

عْلى نْجيمْتي حاسْبينْها ما تْبانْ

*****

لكنْ هي تْجاهِدْ

تْشُقْ الغْيومْ الحالْكَه و تْكابِدْ

ديمَه وْفِيَّه وْ عاطيَه بالعاهِدْ

تَسْهِلْ عْليكْ تْجِيكْ يا يَقْظانْ

وْ مهْما تْكونْ شْدايِدْ تُظْهُرْ وْ يلمِعْ نورْها و يْبانْ

*****

هَزِّيتْ ليكْ عْيُوني

نِجْمِةْ سْمايا تْفَرْجيلي مْحوني

و نْخَبْرِكْ بشْجوني

نيرانْ قلبي شاعْلَه نيرانْ

و الناسْ كي لاموني

قالولي يا مجْنونْ يا يقْظانْ

*****

قالوا عْليَّ صْميتَه

طُفْلْ صْغيرْ وْ سايِرْ عْلى نِيتَهْ

و عاشقْ بْنيَّه بْسِيطَه

وْ يمْشِي مْعاها وْ راقِدْ وْ مِطْمانْ

وْ عامِلْ عْليها زِيطَهْ

وْ مِسْكينْ جاهِلْ ما عْرَفْ نِسْوانْ

*****

قالوا اكبِحْ جْماحِكْ

و لْبِنْتْ حوّا ما تْوَرِّي سْلاحِكْ

و احْرِصْ عْلى مْراحِكْ

و اسْتَحْفِظْ عْليهْ لا تْطُبْلَه نسوانْ

و مْعاها عيشْ دِيمَه ضاحِكْ

و لْبِنْتْ حوّا ما تْمِدْ آمانْ

*****

قلْتِلْهِمْ خَلُّوني

ها البنتْ هَاذِي عْيونْها قِتْلُوني

و لْحاظْها ضَرْبُوني

وْ في سِرْ قلبي تْرَشّْقوا رَشْقانْ

وْ في اهْدابْها رَبْطوني

وْ هي غْزالي زينِةْ الغُزلانْ

*****

ها البنتْ نا راغِبْها

نُنْظُمْ عْليها ابْياتْ و انْرَتِّبْها

نُوصِفْ مْحاسِنْ سِرْها حاجِبْها

ما تْشُوفْهاشْ عْيُونْ ها الإنسانْ

وْ ما يْشوفْها كان اللِّي هو حابِبْها

وْ حُبُّو كْبِرْ ما صَابْلُو هَزَّانْ

*****

سُبْحانْ من صَوِّرْها

من كُلّ ْ صِيفَه كامْلَه كَمِّلْها

و اطْرافْها فَصِّلْها

فَصّالْ يِتْقِنْ صَنْعْتو فَنَّانْ

و اقْسامْها زَيِّنْها

من كُلْ زينَه تامَّه تَزْيانْ

*****

كيفْ يِنْسْدِلْ شْعَرْها

خَمْرِي طْويلْ جْدايْلَه منظِرْها

مْعَ الرّيحْ كي يْطَيِّرْها

تْخَفِّقْ تْطيرْ وْ ما لْها جِنْحانْ

وْ كي تْحَدِّرْ عْلى ظْهَرْها

سْبايْلِ طْوِيلَه تْجاوِزْ المِسْلانْ

*****

و الاَّ كي تْغَطِّي صْدِرْها

تْخَبِّلْ و تِثْني وْ يِنْطْبَقْ شْطَرْها

وْ يَقْظانْ كي يُخْزُرْها

يُغْدا يْضْيعْ وْ تِرْدْمِه رَدْمانْ

أمّاكْ كي تُضْفُرْها

ضْفِيرِةْ شُعاع السَّمْشْ في نِيسانْ

*****

و حْواجِبْ حرْقوصْهُمْ سَطِّرْهُمْ

مْقَوْسِينْ عا عْيونْ فاضْ عْسَلْهُمْ

بْياضْ الحليبْ بْحَرْهُمْ

وْ في وسْطْهُم يِضْوي عْسَلْ ضَوْيانْ

عْيونْ المَها كيفْ زادْ حافْ شْفَرْهُمْ

مَنْظومْ كاحِلْ كَحّْلَه فَنّانْ

*****

و خْدودْها نَوِّرْهُمْ

بَرْدْ الشْتا و حْلا في مَظْهِرْهِمْ

وَرْدْ الرْبيعْ الخِصْبْ زادْ بْهَرْهِمْ

لَمّوا حْمورةْ شْقايِقْ النُّعمانْ

تِفّاحْ جِرْبَه فاحْ كيفْ حْضَرْهِمْ

تْخَلِّطْ مْعاهْ الخوخْ و الرّمّانْ

*****

شِفّاتْ حافْ سْطَرْهِمْ

جيداتْ رُقَّهْ لُونْهِمْ حَمِّرْهِمْ

لِمْعوا وْ شِعْلُوا وْ نورْهِمْ نَوِّرْهِمْ

فايِضْ عْلِيهِمْ قُرْمِزْ وْ ريحانْ

نِهْبِلْ نْجِنْ نْضِيعْ كي نَعْصِرْهِمْ

نَرْوِي ضْمايا وْ نِنْتْشِي سَكْرَانْ

*****

و سْنونْ كي تْظَهِّرْهِمْ

تَضْحِكْ يْبانُوا يِلْهْبُو بِقْدَرْهِمْ

تَبْرُورْ ولاَّ رْخامْ في مَظْهِرْهِمْ

عِقْدْ الجْواهِرْ جَيِّدْ اللَّضْمانْ

و الرِّيقْ سالِسْ طابْ كي مَرْمِرْهِمْ

خَمْرِةْ سْنِينْ صْفِتْ للسَّكْرانْ

*****

و الجِيدْ طالْ وْطَوِّلْ

جِيدْ الغْزالْ طْويلْ ما يِتْحَوِّلْ

بُلاَّرْ صَافِي عْلِيهْ نا مِدَّرْوِلْ

مْنَمِّشْ صْقِيلْ وْ صَقْلْتَه صَقْلانْ

مْخَطِّطْ خْطوطْ رْهافْ كي يِتْشَوِّلْ

يْبانُوا مْواجْ خْفافْ في غُدْرانْ

*****

و زْنودْ عودْ السَّرْوِلْ

مِبْرِي وْ مِسْوِي مْعَ النَّسِيمْ ادَّرْوِلْ

يُرْقُصْ يْمِيلْ وْ يِنْثْنِي وْ يِتْجَوِّلْ

يَعْطِفْ يْموجْ مْع الهْوا مُوجانْ

وْ في اطْرْفَهْ فَتِّحْ العُودْ وْ تَهْلِلْ

صْوابِعْ رْقِيقَهْ ظْفارْها رِيحانْ

*****

و الصَّدْرْ فاضْ وْ كَمِّلْ

يَوْساعْ يِسْوِي يِنْبْطَحْ يْمَيِّلْ

رَوْيانْ ثارِي مْعَ النّْدى مِتْهَيِّلْ

مَصْقولْ صاقِلْ مَلْعِبْ الفِرْسانْ

حتّى الثْمَرْ الخِصْبْ فيهْ مْهَدِّلْ

ثَمْرْ الجْنايِنْ صايْنَهْ جنَّانْ

*****

و الجوفْ ضامِرْ خاوِي

جوفْ الغْزالْ الحُرْ صَحْرا غَاوِي

ولاَّ الحْزامْ رْهِيفْ ماتِنْ قاوِي

لاهو ضْعِيفْ لا صَايْبَهْ نُقْصانْ

ولاَّ الكْفَلْ مَشْدُودْ لاهو فْضَاوِي

مَتْمومْ كاملْ مُوزُونْ بالمِيزانْ

*****

و الفَخْذْ هابِطْ سَاوِي

ولاّ العْظا مَلْيانْ سَاطِعْ كَاوِي

ولاَّ الخْلالْ مَبْرومْ كامِلْ راوِي

زَيْ القْصَبْ في جْوانِبْ الغُدْرانْ

ولاَّ الرّْخامْ الزِّينْ لامِعْ ضاوِي

عَرْصْ الـجْوا في مْعابِدْ الرُّومانْ

*****

ولاّ الخْيالْ السَّاوِي

نَخْلْ العْلا طالبْ سْماهْ وْ غاوِي

حامِلْ ثْمارَه مْشَمْرْخَه و تْهاوِي

عَرْجُونْ طايِبْ مْعَسِّلْ وْ مَلْيانْ

شَعْشِعْ مْعَ نورْ الشْفَقْ الضَّاوِي

يَخْطِفْ العَقْلْ وْ يِسْحِرْ الوِجْدانْ

*****

ولاَّ القْوامْ السَّاوِي

مَمْشُوقْ أَهْيِفْ زَيْ سَرْوِلْ راوِي

صَفْصَافْ نابِتْ في جْنانْ النَّاوِي

حامِلْ عْنِبْ خْرِيفْ طابْ زْيانْ

ولاَّ الْقَدْ مْلِيحْ نُورَه ضَاوِي

بَدْرْ السْما كَمِّلْ شْعِلْ ضَوْيانْ

*****

يا نَجْمْ طالْ كْلامِي

وْ في وَصْفْها مَعْجُولْ دِيمَه حامِي

نُنْظُمْ القُولْ نْفَصْلَه بِتْمامي

عْلى زِينْها ما شَبْهاشْ زْمانْ

وْ في وَصْفْها نِرْغِبْ وْ دِيمَهْ ضامِي

وْ تِصْوِيرْها ما يِقْدْراشْ لْسانْ

*****

تِصْوِيرْ ما يِتْصَوِّرْ

و اللي تْشُوفَه العِينْ ما يِتْحَوِّرْ

يْخُشْ الجْواجِي الغارْقَه و يْعَمِّرْ

يُسْكُنْ القلْبْ يِنْزادْ فيهْ عَقْدانْ

وْ يِبْقى احْساسْ سْخونْ ما يِتْغَيِّرْ

ما يْتَرْجْماشِي قُولْ لَوْ يَمْتانْ

*****

يا نَجْمْ هاذِي قِصَّه

رِحْلِةْ خْلا مَرْحولْها ما رَسَّى

مَرْكِبْ بْحَرْ بِعْدِتْ عْلِيهْ المَرْسى

خَشْ الغْرِيقْ مْراتِعْ الغِيلانْ

ناشِرْ قْلُوعَهْ مْعَلْقَه في نُصَّهْ

دَفَّهْ مْتِينَه شَادّْها قُرْصانْ

*****

قُرْصانْ عارفْ ماهِرْ

خابِرْ المُوجْ عْشِيرْ بَحْرْ وْ ثَايِرْ

راسُوا صْحِيحْ تْقولْ صَخْرْ وْ كافِرْ

جامِحْ وْ هايِجْ وْ لابْسَهْ شِيطانْ

حتّى كْنُوزْ الكُونْ بِيها كافِرْ

كَنْزِهْ جَزيرَه ما حْواها مْكانْ

*****

كَنْزِهْ جَزِيرَه حُرَّهْ

بِكْرْ الوْطا ما لاَطْهاشِي جُرَّهْ

بَرْ الخْلا فِيها وْ صايِنْ بَرَّهْ

نَبْتْ الخْلا وَ الهُوشْ و الغُدْرانْ

خِصْبْ الحْيا فيها مْخَبِّي سِرَّهْ

طالِبْ مُزارِعْ يَفْجْرَهْ فَجْرانِ

*****

كَنْزِهْ جَزِيرَهْ حُرَّهْ

عْلى جْناحْ طِيرْ وْ تايِهْ عْلى بَرَّهْ

عْقابْ السْما ناشِرْ جْناحَه كَرَّهْ

مالِكْ فْضاها يْحَوِّمْ وْ نَشْوانْ

ولاَّ عْلى جِنْدْ القْطا كي شَرِّهْ

عُرْضْ الفْضا كي رَدّْمَه رَدْمانْ

*****

ولاَّ عْلَى غِيمْ الفْضا كِي جَرَّه

قَلْوِسْ سْحابِهْ رِيحْ غَلِّقْ بَرِّهْ

غَيِّمْ عْلَى طُولْ الـمْدَى بِالمَرَّه

ظَلِّمْ عْلَى رُوسْ العْلاَ وَ دْكَانْ

ولاَّ عْلَى دَمْعْ السْمَا في قِرَّه

سَيِّحْ غْزِيرْ وْ هَرْهِرْ الوِدْيَانْ

*****

كَنْزِهْ جَزِيرَه حُرَّهْ

رَكْضْ الفْرَسْ مَمْحُونْ عَنْدَهْ غَرَّه

ولاَّ صَهِيلْ حْصَانْ يُومْ الكَرَّه

يَصْهِلْ صْهِيلْ يْرَعِّشْ الوِجْدانْ

شَايِفْ فْرَسْ وْ حانِيَهْ في هَرَّهْ

مُهْرَه صَغِيرَه وْ تَايْهَه تُوهَان